कोरोना कॉमेंट्री
बाँट के खुवाणो देखो,
छाण के पीवाणो देखो,
खाँसणो सीखाणो देखो,
हाथां को धुवाणो देखो।
पति सूं पूवाणो देखो,
काकड़ी कटाणो देखो,
घाघरी धुवाणो देखो,
भांडां को मंजाणो देखो।
नेता घणो स्याणो देखो,
टीवी पै भुलाणो देखो,
थाळी को बजाणो देखो,
नाचणो - नचाणो देखो।
मिरचां को लगाणो देखो,
रीतग्यो किराणो देखो,
बाजारां मं जाणो देखो,
खड्यो पावै थाणो देखो।
पुलिस को रुकाणो देखो,
भाज के भजाणो देखो,
मुर्गला बनाणो देखो,
ढूंगां को सुजाणो देखो।
नातो न ठिकाणो देखो,
जाणो न बुलाणो देखो,
कवै है 'बुडाणो' देखो,
लाग्यो अठै न्याणो देखो।
*उमेश'बुडाना'*
